- 310 -

1380. März 27. Liegnitz.

Herzog Ruprecht verreicht für sich und als Vormund seiner Brüder der Stadt das Ablagegeld von welschen und andern Weinen, welchen Zins sie von Hans Cranch erkaufte.

In gots namen amen. Wir Ruprecht von gots genadenn herczog yn Slezienn vnd herre czu Legnicz bekennen vffinlich mit desim briue allin, die en sehin adir horin lesin, daz vor vns komen ist vnser getrouwir Hannes Cranch, burger czu Legnicz, gesund lyebis vnd vornunft, vnd hat vhbetwungin vnd vnbetrogin bekant, daz her rechtlich vnd redelich vorkouft hat vnd vfgelosin den czins, derde heysit houeczins vonm wynschenkin czu Legnicz, alse von aldirs gewonlich gewest ist yn der stath Legnicz czu gebin von reyual, schabirnak, romanye, malmasye, poczenere vnd alle andirly wyne, die man bringit von welschin landenn, die de yn welschin landenn gewachsin syn, von eyme fudregin vazse eyne halbe mark grosschenn. Ist daz ez nicht fudrig ist vonm czobir czwene grosschenn, waz yn logenn lyt, yo von der logen eynen grosschen, ostir wyen, vngerischin wyen, mererischin wyen von eyme vazse eynen firdung, landwyen, yn Slezien gewachsen, von eyme fudregin vazse sechs grosschenn, von eyme halbin fuder drye grosschen, von eyme virteyle andirhalbin grosschenn, von eyme achtteyle drye ortere von eyme grosschen, wo der wyen yn der egenanten stath geschankit wirt, czu allim rechte vnd herschaft, nichts ousczunemen, alse her den seibin houeczins gehabt, gehabin vnd besezsin hat vmbe sechsczick mark Behmisschir grosschenn Polnisschir czal, der her gar vnd gancz genuglich beczalit ist, vnsern getrouwin lieben borgermeystir vnd rathmannenn der stath Legnicz, diede iczund syn vnd allin, die yn czukunftegin czyetenn noch enn borgermeystir vnd rathmanne der stath Legnicz werdin gekorin, czu habin, czu besiczin, vnd czu hebin vnd an erin fromen vnd nucz czu wendin, wie enn daz behagit allirbeste; vnd wir habin durch err getrouwin dienste vnd bethe willen von vnser selbist wegin vnd von der hochgebornen furstenn . . herczogenn Wenczlaws, Bonczlaws vnd Heynrichs vnser lieben brudre wegen, diede ouch von gots gnadenn . . herczogenn syn yn Slezien vnd mit vns erbherren czu Legnicz, den obgenantin houeczins vonm wyenschenkin czu Legnicz czu allinm rechte vnd herschaft alse en Hanke Cranch gehabt, gehabin vnd beseczsin hat, noch dez briues lute, den her dorobir gehabt hat, vnsern getrouwin liebin borgermeystir vnd rathmannen vnser stath Legnicz, die iczund syn vnd allin denn, diede noch enn borgermeyster vnd rathmanne der selbin stath Legnicz noch enn gekorin werdin, vnd by namen der stath zcu Legnicz gelehin, gereychit vnd gelangit czu habin, czu besiczin vnd czu hebin, czu vorkoufin, czu vorgebin vnd czu vorseczin vnd domete czu tun vnd czu losin von der stath wegin, wie enn daz behagit allirbeste, vor sechsczik mark grosschenn vnd nicht touwirr. Dese lehenn habin wir getan vnschedlich vns, obgenantin herrenn gebrudernn vnd allin vnsern nochkomelingenn, erbherrenn czu Legnicz an der losunge vnd wedirkoufe dez selbin houeczinsis, den wir mit rechte doran habin vnd en vns by namen behaldin vmbe sechsczik mark grosschenn. Dez czu sichirheyt han wir enn desin brieff gegebin vndir vnserm gemeynen yngesegil. Daz ist gesehen czu Legnicz noch Crists geburde vnsers liebin herren dryczenhundirt jare ynm achtsegstin jare anm denstag ynn Ostirheylgin tagenn. Doby syn gewest vnserr getrouwe liebin, er Bernhard von Furstensteyn, er Ditherich Predil, Nitsche Heyner, Nycolaus Rozeman, Wilrich von Guske, Burguld von Slewicz vnd Thomas Gyethan, vnser schryeber, deme wir diz beuolin.

O. d. St. L. No. 150. Das Siegel an Pergamentstreifen. — Bitschens Privilegb. f. XLVIIb.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866